睇到咁多人係FB呻暑期工嘅野, 令我諗番起以前我既經歷.
1. 話說我中四SUMMER時MISS介紹我去白花油(無錯, 即係顏福偉果度)做市場調查員, 任務係要通街訪問人, 包括不同年齡組別, 直至完成300份問卷.
大家都知, 我一向係怕醜仔(直到而家都係), 有D宅, 唔多朋友, 要我企街四出兜搭人做問卷, 我真係會淆晒底!
我無計可施, 惟有番屋企!
我發現原來我屋企有人, 包括不同年齡組別, 於是我首先訪問爸爸, 媽媽, 家姐, 弟弟, 妹妹......之後打埋電話俾外公, 舅父, 表兄弟姊妹......
當冚家成員都俾我訪問晒時, 我發覺只能完成幾十份左右!
我好沮喪, 但我記得我仲有朋友同學, 於是又打電話訪問埋佢地......
但係, 我CHUR到行晒, 都只能完成100份左右!
硬著頭皮, 出街訪問人.
但我又拙於辭令, 樣又衰(即係我之前POST果張著POLO SHIRT舉V字手勢起孖果隻四眼龜), 又怕被人拒絕, 進展好慢!
到咗交功課前一日, 我仲差100份!
於是, 我用最後既方法:
就係自己訪問自己, 填晒剩果100份!
頂, 真係年少無知, 不知天高地厚!
講得PRO D就係性格分裂, 講得直D就係~~偽造!
顏福偉呀, 我對你唔住!
我肯定你個市場調查, 係歷史上結果最唔準既市場調查!
為左補償, 我會買番多D白花油架啦, 我會盡量將你果首'愛多80年'介紹俾我既爸爸, 媽媽, 家姐, 弟弟, 妹妹......之後打埋電話俾外公, 舅父, 表兄弟姊妹......
呢D野, 各同學真係唔好學!
2. 話說我又做過OFFICER.
呢間公司得幾個人, 位於工廠區.
本來天氣咁熱, 又要早起身, 加上正值4年一度既世界杯, 我真係唔想去. 但總算好近屋企, 所以姑且番下先.
記得番左10日左. 有一日星期六, 番半晝, 正準備收工.
放工前, 仲打定電話, 約咗我當時既女友!
呢個時候, 老闆既女友(即係我上司), 叫我唔好走住!
拿拿拿, 女人真係LIKE比較架.
老闆因為今日無約到佢, 佢好苦惱; 加上我又懶HIGH咁大大聲約女友出街咁SWEET, 佢就留難我, 阻我去街囉.
佢不斷問我好多無聊問題, 結果攪到我遲成10幾分鐘先走得!
果陣時, 條氣好唔GUR, 真係年少氣盛!
星期一早上, 我決定辭職, 但又唔想行番公司, 於是用FAX機FAX信過去! 內容係咁:
'親愛的老闆:
由於本人熱愛足球, 加上世界杯已進入淘汰賽, 深夜睇波令本人精神不振!! 現正式向你辭職!
至於本人的十日薪金, 我不要了!
張欣欣啟'
用FAX辭職, 唔要薪水, 我諗香港都無第2個!
呢D野, 各同學真係唔好學!
其實仲有第3架, 不過無力打字啦......
Search